Cun ils reglaments e las cundiziuns da contract vertents dal IOC (International Olympic Committee) èsi irresponsabel da realisar gieus olimpics d’enviern en las Alps. Las consequenzas per l’uman e l’ambient n’èn betg pli supportablas. Il profit economic per paucs chaschuna auts daivets per il maun public e donns gravants da l’ambient. Suenter las experientschas da Turin 2008 e Vancouver 2010 enconuschan ins ils problems dals stabiliments ed indrizs betg pli duvrads e la gronda chargia da debits.

Ils promoturs grischuns d’ina candidatura per ils gieus olimpics d’enviern accentueschan adina puspè ch’els veglian vegnir davent dal gigantissem. Da preschent exista nagut auter ch’in studi davart la realisabladad – natiralmain positiv. Pir suenter ch’ins ha gudagnà la votaziun grischuna dals 3 da mars 2013 vegn alura lantschà in project preliminar che sto surmuntar ils obstachels dal IOC per arrivar a la preselecziun ed eventualmain a la candidatura lubida. Ed en cas ch’ils gieus vegnan concedì al Grischun, na resta anc bler betg liant per il IOC. Sin fundament dals dossiers da candidatura “Tavau 2010” e “Salzburg 2014” sco era “Minca 2018” san ins: il IOC concluda betg mo ses contracts da Host City cun ils organisaturs pir suenter l’attribuziun dals gieus, mabain segirescha era ses dretgs senza resguard. Tut ils giavischs, las affirmaziuns ed empermischuns en il dossier da candidatura daventan alura bainbaud maculatura.

Las votaziuns grischunas davart l’olimpiada San Murezzan e Tavau daventan ina dumonda da cardientscha. Per la propaganda fiss ina candidatura anc buna, din ils ins, ils gieus sezs na vul ins gnanc, mabain ils 30 milliuns francs da la confederaziun. Il meglier scenari è in Na ils 3 da mars 2013, quai custa il pli pauc: mo 5 milliuns francs per palpiri scrit d’experts. Ed in dictat ester entras il IOC croda alura era davent!